Afhayeenka Kooxda Al-Shabaab Cali Dheere ayaa duhurnimadii maanta xaruntii guulwadayaasha ugu soo bandhigay nin uu sheegay inuu yahay sarkaal ka tirsan dowladda soomaaliya iyo qoryaha Ak-47 oo gaarayay ilaa kontameeyo, kuwaasoo aanay cidina ku hubeysneyn.

Cali Dheere ayaa ku beer laxawsaday in hubkaas ay ciidamo kala soo goosteen dowladda, hase ahaatee goobta uguma soo bandhigin hal ciidan, waxaase dhinaciisa fadhiyay sarkaal sheegtay inuu dowladda ka soo goostay.

"Ninkaan aad u jeedaan wuxuu ka tirsanaa qolada ridada, run ahaantii wuxuu gartay wadadii qaldaneyd ee uu ku jiray, Alle waa uu u towbad keenay"ayuu yiri Cali Dheere oo ugu baaqay ciidamada dowladda in ay ka soo baxaan safka cadawga.

Cali Dheere ayaa sidoo kale sheegay in ay nabadgelin doono ciidamo kasta oo ka soo goosta dowladda ee ku soo biira safka mujaahidiinta sida uu hadalka u dhigay.

Sarkaalkan ayaa saxaafada la hadlay, isagoo sheegay in lagu magacaabo Baashi Axmed, waxaana uu tibaaxay inuu ahaa sarkaalka ugu sareeya ciidamada dowladda ee ku sugnaa Warshadii hore ee Nac naca.

Mar la weydiiyay sababaha uu uga soo fakaday dowladda ayuu sheegay inuu ku qanci waayay arrimo badan, isagoo si gaar ah u xusay shareecada islaamka oo uu tilmaamay in aanay dhab ka aheyn dowladda.

Dhinacyada isaga soo horjeeda dalka ayaa mudooyinkii u dambeeyay dagaal dhanka warbaahinta ku jiray, taasoo noqotay mid dowladda ay si aad ah dhaawacyo ugu geysato kooxaha mucaaradka, hase ahaatee tallaabada maanta ayaa la dhihi mid ay shabaabka ku xoojinayaan barobagandadooda.